PHR-ის იურისტები კვლავ განაგრძობენ ქალთა მიმართ ძალადობის შესახებ სამუშაო შეხვედრებს საქართველოს რეგიონებში. შეხვედრების ციკლი მიზნად ისახავს სამედიცინო დაწესებულებებში დასაქმებული ექიმებისა და ექთნების ცნობიერების ამაღლებასა და მათ ინფორმირებულობას ადგილობრივ თემში ქალთა მიმართ ძალადობის კონტექსტისათვის სპეციფიკური მახასიათებლების შესახებ.
28 ივნისს, სწორედ ამ მიზნით, ვანის მუნიციპალიტეტში, PHR-ის იურისტებმა სამედიცინო ცენტრ „ჯეოჰოსპიტალსში“ სემინარი თემაზე – ექიმის როლი ძალადობაგამოვლილი ქალის მხარდაჭერის პროცესში, – გამართეს.
სემინარზე იურისტებმა ისაუბრეს ძალადობის ფორმებზე, ოჯახში ძალადობაზე, მის მახასიათებლებზე, ძალადობისგან დაცვის მექანიზმებსა და სერვისებზე. მონაწილეებს მიაწოდეს ინფორმაცია ექიმის მიერ ძალადობაგამოვლილი ქალის იდენტიფიცირების მეთოდებისა და გზების, ძალადობაგამოვლილ ქალთან ურთიერთობის სახელმძღვანელო პრინციპების შესახებ. მათ, ასევე, განიხილეს ექიმის როლი მტკიცებულებების შეგროვების პროცესში და სამართალდამცავი ორგანოებისათვის ინფორმაციის მიწოდების საკითხი.
შეხვედრას ინტერაქციული ხასიათი ჰქონდა. განსაკუთრებული ინტერესი გამოიწვია ძალადობის მსხვერპლი ქალის თავშესაფარში მოთავსების საკითხმა. მონაწილეთა განმარტებით აღნიშნული სერვისი, შესაძლებელია, მნიშვნელოვანი ფაქტორი აღმოჩნდეს ძალადობაგამოვლილი ქალის მხარდაჭერის პროცესში. შეხვედრისას მონაწილეებმა გამოჰყვეს სამართალდამცავი ორგანოებისათვის შეტყობინების შემთხვევაში ანონიმურობის დაცვის საკითხი. მათი თქმით, პოლიციისათვის ძალადობის შესახებ შეტყობინების რაოდენობა გაიზრდება თუ შემტყობინებლის შესახებ ინფორმაცია კონფიდენციალური იქნება გახდება. სემინარის მონაწილეებმა, რეკომენდაციის სახით აღნიშნეს, რომ სპეციალური სამედიცინო ფორმების არსებობა დაეხმარებოდა მათ ძალადობის ფაქტის დეტალურ დოკუმენტირებაში.
სამუშაო შეხვედრის ორგანიზება შესაძლებელი გახდა ამერიკელი ხალხის გულუხვი დახმარების წყალობით, რომელიც აშშ–ს საერთაშორისო განვითარების სააგენტოს (USAID) მეშვეობით იქნა გაწეული. სამუშაო შეხვედრის შინაარსზე პასუხისმგებელია ორგანიზაცია “პარტნიორობა ადამიანის უფლებებისთვის (PHR)”. ის შესაძლოა, არ ასახავდეს USAID-ის, აშშ–ის მთავრობის ან აღმოსავლეთ – დასავლეთის მართვის ინსტიტუტის შეხედულებებს.
Partnership for Human Rights 