არასამთავრობო ორგანიზაცია „პარტნიორობა ადამიანის უფლებებისთვის (PHR)”, ეხმიანება სხვადასხვა მედიასაშუალებებში გავრცელებულ ინფორმაციას, 13 წლის მოზარდის შესახებ, რომელზეც თავდასხმა განხორციელდა საცხოვრებელი სახლის ლიფტში. მომხდარზე მიმდინარეობს გამოძიება საქართველოს სისხლის სამართლის კოდექსის 19-117-ე მუხლის მე-5 ნაწილის „ბ“ ქვეპუნქტით და ამავე კოდექსის 151-ე მუხლის მე-2 ნაწილის „გ“ ქვეპუნქტით, რაც გულისხმობს ჯანმრთელობის განზრახ მძიმე დაზიანების მცდელობას წინასწარი შეცნობით არასრულწლოვნის მიმართ და სიცოცხლის მოსპობის მუქარას; ასევე, წინასწარი შეცნობით არასრულწლოვნის მიმართ. აღნიშნულ სისხლის სამართლის საქმეში არასრულწლოვნის ინტერესებს PHR-ის ადვოკატი იცავს.
ორგანიზაცია მოუწოდებს მედიასაშუალებებს, თავი შეიკავონ გადაუმოწმებელი, არასწორი ინფორმაციის გავრცელებისგან, მათ შორის, არასრულწლოვნის მიმართ სხვაგვარი ძალადობის შესახებ, რათა ზიანი არ მიადგეს ბავშვის ინტერესებს. PHR-ი ყველა სამართლებრივ საშუალებას გამოიყენებს არასრულწლოვნის საუკეთესო ინტერესების დასაცავად.